វិធីសាស្ត្រដោះស្រាយបញ្ហាបែបពហុភាគី ឬ Multi-Stakeholder Action Lab (MAL) គឺជាដំណើរការសហការបង្កើតដំណោះ- ស្រាយរួមគ្នាដែលផ្អែកលើវិធីសាស្ត្រ Living Labs។ តាមរយៈដំណើរការនេះ សហគមន៍ និងដៃគូពាក់ព័ន្ធនឹងធ្វើការរួមគ្នា ដើម្បីស្វែង​ យល់​​ពីបញ្ហា បង្កើតដំណោះស្រាយដែលមានសក្តានុពលមួយ សាកល្បងដំណោះស្រាយនោះ និងរៀនសូត្រពីលទ្ធផលដែលទទួលបាន។

សម្រាប់កម្មវិធី “ភូមិត្រៀមខ្លួនសម្រាប់បម្រែបម្រួលអាកាសធាតុ” MAL នឹងចាប់ផ្តើមពីស្ថានភាពពិត និងតម្រូវការជាក់ស្តែងរបស់សហគមន៍។ វាមិនមែនជាការពិគ្រោះយោបល់តែមួយលើក ឬជាការនាំយកដំណោះស្រាយដែលបានរៀបចំរួចមកដាក់ប្រើក្នុងភូមិណាមួយនោះទេ។ វាជាដំណើរការរយៈពេលច្រើនឆ្នាំមួយ​ដែលចាប់ផ្តើមពីការស្វែងយល់ពីតម្រូវការជាក់ស្តែង ការផ្តល់អាទិភាពលើបញ្ហា ការបង្កើតដំណោះស្រាយរួមគ្នា ការសាកល្បង ការទទួលយកមកប្រើប្រាស់ និងការរៀនសូត្រពីការសាកល្បងនោះ។

សហគមន៍ដៃគូនឹងត្រូវបានជ្រើសរើសតាមរយៈដំណើរការជ្រើសរើសតំបន់គោលដៅ។ កម្មវិធីនឹងពិចារណាលើកត្តាសំខាន់ៗដូចជា ភាពងាយរងគ្រោះពីអាកាសធាតុ ផលប៉ះពាល់លើជីវភាពរស់នៅ ស្ថានភាពសេដ្ឋកិច្ច-សង្គម លទ្ធភាពអនុវត្តការងារ ការគាំទ្រពីអាជ្ញាធរមូលដ្ឋាន និងឆន្ទៈរបស់សហគមន៍ក្នុងការចូលរួម។

បន្ទាប់ពីសហគមន៍ដៃគូត្រូវបានជ្រើសរើស កម្មវិធីនឹងធ្វើការវាយតម្លៃភាពងាយរងគ្រោះ និងតម្រូវការផ្នែកអាកាសធាតុ តាមរយៈការស្ទង់មតិពីសមាជិកគ្រួសារ ការសម្ភាសន៍ផ្ទាល់ ការពិភាក្សាជាក្រុម និងការពិគ្រោះយោបល់មួយទាល់នឹងមួយ។ សមាជិកសហគមន៍ និងក្រុមគោលដៅដែលយើងធ្វើការជាមួយនឹងមិនត្រឹមតែផ្តល់ព័ត៌មានប៉ុណ្ណោះទេ ប៉ុន្តែនឹងចូលរួមយ៉ាង​​​ សកម្ម​ក្នុងការផ្ទៀងផ្ទាត់​លទ្ធផលដែលបានរកឃើញ និងកំណត់រួមគ្នានូវបញ្ហាសម្របខ្លួនទៅនឹងអាកាសធាតុដែលកម្មវិធីនឹងជួយគាំទ្រ។

ដូច្នេះ បញ្ហាប្រឈមដែលនឹងទទួលបានអាទិភាពនឹងត្រូវបានកំណត់តាមរយៈការចូលរួមរបស់សហគមន៍ និងផ្ទៀងផ្ទាត់ជាមួយដៃគូពាក់ព័ន្ធ។ សមាជិកសហគមន៍នឹងទទួលបានការគាំទ្រនៅគ្រប់ជំហាន ដើម្បីធានាឱ្យបាននូវការចូលរួមប្រកបដោយទំនួលខុសត្រូវ បរិយាប័ន្ន និងមានអត្ថន័យ។

ក្នុងគម្រោង ICCAP ពាក្យថា “អាចចាត់ទុកជាមូលធនបាន” សំដៅលើការដែល​ដំណោះស្រាយសម្របខ្លួនទៅនឹងអាកាសធាតុមួយអាចត្រូវបានទុកជាមូលធនហិរញ្ញប្បទានដោយស្ថាប័ន​​​ស្ថាប័នហិរញ្ញវត្ថុ។ តម្លៃនេះអាចជាតម្លៃជារូបិយវត្ថុ ឬមិនមែនជារូបិយវត្ថុ។ ក្នុងករណីខ្លះ វាអាចយកមកប្រើជាប្រាក់ចំណូលផ្ទាល់ ឬការសន្សាំ។ ក្នុងករណីផ្សេងទៀត វាអាចមានរូបភាពជាការជៀសវាងការខាតបង់ ការកាត់បន្ថយភាពងាយរងគ្រោះ ការពង្រឹងភាពរឹងមាំ ប្រយោជន៍សាធារណៈ ឬគុណតម្លៃសង្គម និងបរិស្ថានទាំងមូល។

ដំណោះស្រាយសម្របខ្លួនទៅនឹងអាកាសធាតុដែលអាចចាត់ទុកជាមូលធនបាន​​​ គួរតែឆ្លើយតបទៅនឹងតម្រូវការពិតរបស់សហគមន៍ ពង្រឹងសមត្ថភាពសម្របខ្លួនរបស់សហកមន៍នោះ អាចយកមកប្រើបានដោយងាយស្រួល មានបរិយាប័ន្នផ្នែកសង្គម និងអាចបង្ហាញគុណតម្លៃដែលអាចទាក់ទាញតួអង្គហិរញ្ញវត្ថុ ឬដៃគូឱ្យចូលរួមសាកល្បង ពង្រឹងកែលម្អ និងគាំទ្រដល់ដំណោះស្រាយនោះ។ ដំណោះស្រាយនោះមិនចាំបាច់ល្អឥតខ្ចោះតាំងពីដំបូងនោះទេ ប៉ុន្តែគួរតែមានភាពពេញលេញដើម្បីអាចយកទៅកែលម្អបន្ថែម សាកល្បង ផ្ទៀងផ្ទាត់ដើម្បីឈានទៅដល់ដំណាក់កាលមួយដែលសហគមន៍អាចយកទៅប្រើបាន និងអាចទទួលហិរញ្ញប្បទានបាន។

ដំណោះស្រាយបៃតងដែលអាចចូលរួមមានដូចជា៖​ បច្ចេកវិទ្យា សេវាកម្ម គំរូអាជីវកម្ម កញ្ចប់ហិរញ្ញវត្ថុ វិធានការដែលផ្អែក លើប្រព័ន្ធអេកូឡូស៊ី ការកែលម្អហេដ្ឋារចនាសម្ព័ន្ធ ឬការរៀបចំស្ថាប័នដែលជួយសហគមន៍ជនបទសម្របខ្លួនទៅនឹងហានិភ័យអាកាសធាតុ និងពង្រឹងភាពធន់។ ដំណោះស្រាយទាំងនេះអាចទាក់ទងទៅនឹងកសិកម្មដែលធន់នឹងអាកាសធាតុ ការគ្រប់គ្រងទឹក ប្រព័ន្ធស្រោចស្រព ថាមពលកកើតឡើងវិញ ភាពរឹងមាំនៃជីវភាពរស់នៅ ការគ្រប់គ្រង និងស្តុកទុកទន្និផលក្រោយប្រមូលផល ព័ត៌មានអាកាសធាតុ ការត្រៀមខ្លួនចំពោះគ្រោះមហន្តរាយ ការស្តារឡើងវិញ ឬតម្រូវការសម្របខ្លួនជាក់ស្តែងផ្សេងទៀត។ គោលដៅចុងក្រោយនឹងអាស្រ័យលើបញ្ហាសម្របខ្លួនទៅនឹងអាកាសធាតុ ដែលនឹងត្រូវបានកំណត់រួមគ្នាជាមួយសហគមន៍ដៃគូ។

ដំណោះស្រាយរបស់អ្នកគួរតែមានការវិវត្តន៍បានគ្រប់គ្រាន់ ដើម្បីអាចយកទៅសាកល្បង កែសម្រួល ឬពង្រឹងតាមរយៈ​វិធីសាស្ត្រ ដោះស្រាយបញ្ហាបែបពហុភាគី។ វាអាចជាផលិតផលដែលមានស្រាប់ សេវាកម្ម ឬគំរូដែលធ្លាប់បានសាកល្បង ហើយមានភស្តុតាង ខ្លះៗអំពីការប្រើប្រាស់ ឬសក្តានុពលរបស់វា។​​ ដំណោះស្រាយនោះមិនចាំបាច់ជាដំណោះស្រាយចុងក្រោយដែលរួចរាល់ពេញលេញទេ។ អ្នកផ្គត់ផ្គង់ដំណោះស្រាយបៃតងគួរតែបើកចិត្តក្នុងការកែសម្រួលដំណោះស្រាយរបស់ខ្លួន ដោយផ្អែកលើមតិយោបល់របស់សមាជិកសហគមន៍ ភាពសមរម្យនៃតម្លៃ ភាពងាយស្រួលក្នុងការប្រើប្រាស់ និងការសាកល្បងនៅក្នុងបរិបទជាក់ស្តែងក្នុងរយៈពេលយូរ។